అల్లా, హరి, యేసు

అల్లా, హరి, యేసు
నాకేమి తెలుసు?
అందమైన చెలి మనసు
పొందు టకె నా తపసు

ఒక్కడైన దేమునికి వేరు వేరు ప్రతిమలు
వేరు వేరు దేశాల్లో వేల కొలది నామాలు
చక్కనైన నా చెలిలో వింత వింత అందాలు
వింత వింత చందాల్లో సోయగాల బంధాలు

పదునాలుగు లోకాలను పాలించే రాజట
నూటెనిమిది నామాలతో ఆ దొరకు పూజట
నా పేద హృదయంలో కొలువున్న దేవతకు
ఏడేడు స్వరములతో రాగ పూజ చేతును

ధూపాలతో దీపాలతో దేవుని కారాధన
జపతపాలు దీక్షలతో ముక్తి కొరకు సాధన
మమకారం చిరు దీపం, వలపే హరిచందనం
గీతాలతో నా చెలిని అర్చింతును దినం దినం